广东话

若然有人问我：「你钟意华语定广东话？」
我可以好直接噉讲：「梗係广东话啦~」
点解？因为喺咁多种汉语之中，我始终觉得：
广东话係至靓嘅，兼係至正嘅。
广东话比华语更加古老，所以佢可以好文雅，
但係，由于佢比华语多出五个发音，所以，
极之丰富嘅发音系统令到广东话好生活化，
加上好多語氣助詞，亦可以讲的係好鬼马。

好多时候，广东话係好难传神噉翻译去华语嘅，
就举个例子：「係囉喎！唔好讲话唔算数噃~」
又或者：「咁喳嘛~仲以为有乜咁叻。」
用华语嚟讲始终唔够生动~

我自细就同屋企人讲粤语，（我祖籍广东信宜）
我嘅华语係入咗学先至识得讲，但係就觉得讲华语好拗口，
唔自然同埋唔能够完全表达心中嘅意思。
又举个例子：我要形容块茶馃好腍。
华语可以讲“很柔软”，但係我嘅意思唔係柔软，
而係腍，或者腍Bet-Bet，即係带有水分嗰种。。
所以就觉得用华语嚟讲冇完全表达到我原本嘅意思。

讲粤语同写粤文係两回事，基本上华语汉字都可以有
粤语读音，但係广东话有好多字眼唔知点写至啱，
好采细嗰阵有睇龙虎门（哇阿咔咔咔。。），
所以学识咗啲广东字，比如：
唔係咁黑吖嘛~
唓，你估我唔知咩！
戥你唔抵囉~
有咁啱得咁巧！
做乜喺度發吽哣？
關你咩事啫？

哈哈哈，係唔係好盞鬼咧？ n_n

其实虽然我都几钟意睇周星驰嘅戏，只但係如果比较
香港话同广州话（广府话），我就喜欢广州话多啲嘞。
点解，因为够纯正够标准。

家阵由于工作，所以讲华语或者英语较多，
希望可以继续自修广东话，作为一种语言（唔係方言），
广东话绝对可以发扬光大，千秋万世不衰！！